Malkia Strikers Waongeza Moto Vietnam, Waingia Siku ya Tatu ya Kambi ya Maandalizi ya Kombe la Dunia

Timu ya taifa ya voliboli ya wanawake ya Kenya, Malkia Strikers, wameingia siku ya tatu ya kambi yao ya mafunzo yenye kasi kubwa nchini Vietnam wakijiandaa kwa michuano ya Kombe la Dunia itakayofanyika kuanzia Agosti 22 hadi Septemba 7 nchini Thailand.

Nahodha wa timu hiyo, Meldina Sande, amesema benchi la kiufundi linafanya kazi ya kujenga mshikamano ndani ya kikosi kipya ambacho kimejumuisha nyuso nyingi mpya zenye ari ya kuonyesha uwezo wao.

“Tumekuwa tukijitahidi kuungana kama kikosi kwa sababu tukiwa timu changa, kila mchezaji ana hamu ya kuthibitisha kwa kocha kuwa anaweza kutimiza majukumu. Wengi walikuwa wakipigania nafasi kwenye kikosi cha mwisho, na baadhi yao wanashiriki mashindano haya kwa mara ya kwanza,” alisema Sande.

Aidha, Sande alitoa wito kwa serikali kuwekeza zaidi kwenye miundombinu ya michezo ili kuhakikisha wachezaji wanapata mazingira bora ya mazoezi, akisisitiza kuwa hilo ni jambo muhimu kwa maandalizi ya Kenya katika mashindano ya bara na ya dunia.

Kama sehemu ya maandalizi yao, Malkia Strikers wanatarajiwa kucheza mechi mbili za kirafiki—dhidi ya Uhispania na Vietnam—kabla ya kuondoka kuelekea Thailand Jumatano, Agosti 20, 2025.

Shirikisho la Voliboli Kenya wiki iliyopita lilitangaza kikosi cha wachezaji 16 kwa ajili ya kambi ya Vietnam, kikiwa na mpango wa kukipunguza hadi wachezaji 14 kabla ya kuondoka Thailand. Hata hivyo, wachezaji wenza wa mazoezi Sarah Namisi na Marriane Sokoiyo walishindwa kupata tiketi za ndege, jambo linalomaanisha kuwa wachezaji wote walioko kambini kwa sasa watasafiri.

Mara 10 bingwa wa Afrika, Kenya imepangwa Kundi G pamoja na mabingwa wa zamani wa Ulaya Poland, Ujerumani, na wenyeji Vietnam.