County
Mabunge Kupeperusha Mijadala Mbashara, Kumsaidia Mpwani Kuelewa Hoja
Ili kuhakikisha wakaazi wa kaunti za Pwani wanafahamu kinachojadiliwa na kupitishwa katika mabunge ya kaunti ni vyema iwapo mabunge hayo yatawekeza mbinu za kisasa za kiteknolojia na kupeperusha mijadala yao moja kwa moja.
Kulingana na Mwanaharakati wa maswala ya kisiasa Dan Owino Aluar, Wajumbe katika mabunge ya kaunti wamekuwa wakijifungia katika mabunge hayo bila ya kujadili maswala msingi yanayomhusu mwananchi.
Akizungumza katika kaunti ya Mombasa, Owino amesema wajumbe hao hawataki kuweka wazi wanayoyajadili kwani kazi yao kubwa ni kupigia debe magavana wa kaunti zao ili wanufaike kisiasa, akisema mabunge hayo yanafaa kupeperusha mijadala yote ya bunge kutumia vyombo vya habari na mitandao ya kijamii.
Kauli sawa na hiyo imetolewa na mkereketwa wa maswala ya kisiasa katika eneo la Changamwe Samuel Chaka ambaye amesema kama inavyofanyika katika bunge la kitaifa na seneti, mabunge ya kaunti hayana budi ila kufuata mkondo huo.
County
Kilifi Imeweka Mikakati Bora ya Kuhakikisha Hospitali na Zahanati Zinakuwa na Madawa ya Kutosha
Naibu Gavana wa kaunti ya Kilifi Flora Mbetsa Chibule amesema serikali ya kaunti ya Kilifi imeweka mikakati bora ya kuhakikisha hospitali na zahanati zote za umma katika kaunti hiyo zinakuwa na madawa ya kutosha.
Chibule amesema tayari serikali ya kaunti hiyo imepitisha bajeti ya fedha za ziadi ili kuhakikisha huduma bora za afya zinawafikia wananchi mashinani, akiwarai wakaazi na wahudumu wa afya kuhakikisha wanalinda madawa hayo.
Akizungumza wakati wa zoezi la uzinduzi wa ujenzi wa jengo la Huduma Centre katika eneo bunge la Ganze, Chibule amesema sekta ya afya hadi mashinani itaboreshwa zaidi.
“Kuna mpango ambao tunaufanya ambao ni kuchukua madawa yetu kutoka KEMSA, japo ule mpango tulikuwa tunataka iko chini ya asilimia 20 lakini madawa yalifika. Nawahimiza wahudumu wa afya na wananchi kulinda raslimali zetu’, alisema Chibule.
Wakati uo huo amepongeza uzinduzi wa ujenzi wa jengo la huduma Centre katika eneo bunge la Ganze, akisema kwamba huduma zote za umma sasa itakuwa zinapatikana kwa urahisi hadi mashinani pindi ujenzi huo utakapokamilika.
Gavana wa kaunti ya Kilifi Gedion Mung’aro amewaonya madaktari na wahudumu wengine wa afya katika kaunti hiyo wenye hulka ya kuiba madawa hospitalini, akisema kwamba watakaopatikana watakabiliwa kisheria.
Akizungumza baada ya kuzindua kitengo cha Radiolojia katika jengo la Kilifi County Medical Complex, Gavana Mung’aro amesema tangu aingie uongozini Serikali yake imefanikiwa kuwakamata wale ambao wamekuwa wakihusika na wizi wa madawa hospitalini.
Kiongozi huyo amesema serikali ya kaunti hiyo kwa ushirikiano na wadau wengine wanaendeleza mikakati ya kuhakikisha hospitali na zahanati za umma katika kaunti hiyo zinakuwa na vifaa vya kisasa vya matibabu.
“Nilipoingia kama Gavana nilianza kusafisha hii kaunti kwa sababu tulipokuwa walikuwa wengi sana lakini inakaa bado wako kwamba watu wanalipa pesa na watu wanapeleka pesa kwa akaunti zao ama wanatengezewa liseni bandia apewe na watu wachukue pesa waeke mfumo, nataka kuwahakikisha kwamba siku chache zijazo nitangaza watu wengi sana ambao wataenda nyumbani,” Gavana Mung’aro.
Kwa upande wake Naibu Gavana wa kaunti hiyo Flora Chibule amesema ushirikiano zaidi utaendelezwa, kati ya serikali ya kaunti na wadau wengine ili kuhakikisha miradi ya maendeleo inatekelezwa ipasavyo.
Ameahidi kumuunga mkono Gavana Mung’aro kufanikisha juhudi bora za utoaji wa huduma kwa wakaazi wa kaunti ya Kilifi, akisema hiyo ndio hatua pekee ya kuhakikisha wananchi wananufaika na miradi ya maendeleo.
“Sisi tuko nyuma yake kumuunga mkono na kwa yeyote yule ambaye ataingia kwa siasa hayo ni ya 2032 lakini tugange haya ya leo ya kwamba siku hii ya leo tunafurahikia tuna mashine ya kufanya ukaguzi wa kiafya,” Chibule.
Karua na Mutunga, waishtaki Tanzania
Wanafunzi wa chuo kikuu cha Pwani wanataka uwazi kuhusu kifo cha Ojwang’
