News
Muturi, Amshutumu Rais Ruto Baada ya Kutimuliwa Kazini
Aliyekuwa Waziri wa Utumishi wa umma nchini Justin Muturi amejitokeza na kupinga kauli ya Rais William Ruto aliyoitoa siku chache zilizopita kwamba alifutwa kazi kwa misingi ya kutowajibika kazini.
Muturi amesema kutimuliwa kwake kazini kulichangiwa na msimamo wake wa kuishinikiza serikali kupitia Rais Ruto kukomesha visa vya utekaji nyara na mauaji ya kiholela nchini.
Katika kikao na Wanahabari jijini Nairobi, Muturi amesema hajutii kufutwa kwake kazi, akisema madai yaliyoibuliwa na Rais kwamba alikuwa haudhurii vikao vya baraza la mawaziri ni uongo mtupu kwani alikuwa amewasilisha maombi rasmi ya kutohudhuria vikao vya baraza la mawaziri.
Muturi amesema licha ya kushinikiza swala la utekaji nyara na mauaji ya kiholela nchini kukomeshwa hakuna hatua zozote zilizochukuliwa na idara husika bali tabia hiyo imekuwa ikiendelea, jambo ambalo sio mikakati ya ajenda ya Kenya kwanza.
Wakati huo huo amemshtumu rais Ruto akisema amekuwa akijitokeza hadharani na kutoa kauli za uongo kuhusu mikakati ya serikali ilhali hakuna mipango yoyote serikali ambayo rais Ruto anatekeleza.
Muungano wa Wazee wa Kaya kaunti ya Kilifi umeitaka serikali kuu kupitia bunge la kitaifa kubadilisha sheria ya mwaka wa 1926 kuhusu uchawi ili kuwezesha utamaduni kudhibiti mauaji ya wazee yanayoendelea kushuhudiwa kaunti ya Kilifi.
Wakiongozwa na Stanley Kahindi Kiraga wamesema kuwa sheria hiyo imechangia pakubwa mauaji ya wakongwe Kilifi kutokana na swala kuwa haitambui uwepo wa uchawi na jinsi ya kuudhibiti.
Kiraga sasa anasema ni sharti sheria hiyo iondolewe au ifanyiwe ukarabati bungeni hali itayopelekea uchawi kudhibitiwa kupitia mila na utamaduni.
“Vijana wanaowaua wazee wakiwasingizia kuwa wachawi wanazidi kuongezeka na kwa sababu hakuna sheria ya moja kwa moja ya kuwashtaki na kuwafunga” amesema Kiraga akieleza kusikitishwa kwake na ongezeko la magenge ya vijana wanaolipwa kutekelezwa mauaji ya wazee kwa shutuma za uchawi.
Taarifa ya Hamis Kombe
Mahakama ya Kilifi imeanzisha upya kesi ya mwanaume mmoja anayekabiliwa na shtaka la ulaghai wa pesa.
Hii ni baada ya Mwanaume huyo kwa jina Samuel Ngonyo, kuachiliwa kwa dhamana hapo awali lakini alikosa kudhuhuria vikao Mahakamani hali iliyopelekea kesi hiyo kuanzishwa upya.
Hakimu mkuu wa Mahakama hiyo Charles Obulutsa aliagiza jamaa huyo kuzuliwa rumande baada ya agizo la kukamatwa kwake kuidhinishwa na Mahakama baada ya jamaa huyo kupuuza vikao vya Mahakama vya awali.
Kabla ya agizo hilo, Mahakama ilielezwa kwamba mnamo tarehe tofauti kati ya mwezi Septemba hadi Oktoba mwaka 2021 katika maeneo la Ganze kaunti ya Kilifi kwa kutumia njia ya ulaghai, mshukiwa alichukua pesa taslimu shilingi elfu 50 ya mlalamishi Grace Sidi Katana.
Mahakama ilielezwa zaidi kwamba mshukiwa alitekeleza kitendo hicho baada kumdanganya Mlalamishi kwamba yeye ni Mwandishi na afisa wa kazi za umma hivyo angemsaidia Moses Katana mtoto wa mlalamishi kupata kazi ya serikali.
Kesi hiyo itaendelea mnamo tarehe 13 mwezi Agosti mwaka huu.
Taarifa ya Mwanahabari wetu
Timu Ya Taifa Ya DR Congo Yawasili Nchini Kwa Mechi Ya Ufunguzi Dhidi Ya Harambee Stars
Wazee wa Kaya wanataka bunge kupitisha sheria kudhibiti mauaji ya wazee
