Sports
Goli la Dominik Szoboszlai Yaipa Liverpool Ushindi wa 1-0 Dhidi ya Arsenal, City Yaduwazwa na Brighton
Goli la mkwaju wa adhabu kutoka kwa kiungo Dominik Szoboszlai ilisaidia Liverpool kupata ushindi wa 1-0 dhidi ya wapinzani wao wa moja kwa moja wa taji, Arsenal, huku Manchester City ikipoteza kwa kushtua 2-1 dhidi ya Brighton Jumapili na kuendeleza mwanzo wao mgumu wa msimu.
Szoboszlai alipiga mkwaju wa adhabu uliopinda vizuri na kumshinda kipa wa Arsenal David Raya dakika saba kabla ya mchezo kumalizika pale Anfield, katika pambano la kusisimua kati ya wagombea wakuu wa taji la Ligi Kuu.
Bao hilo la kipekee la kiungo huyo wa Hungary liliipa Liverpool ushindi wao wa tatu mfululizo ligini, huku Arsenal wakipoteza kwa mara ya kwanza msimu huu baada ya kuanza na ushindi wa mechi kadhaa. Arsenal walimaliza nafasi ya pili nyuma ya Liverpool msimu uliopita, na vilabu hivyo viwili vimekuwa vikishindana kwa usajili wa gharama kubwa tangu mwisho wa msimu uliopita.
Usajili wa mastaa wakubwa umefanywa ili kuongeza nguvu kwenye mbio za ubingwa, Liverpool wakiwapata Florian Wirtz na Hugo Ekitike, huku Arsenal wakiwapata Martin Zubimendi na Viktor Gyokeres.
Hata hivyo, hakuna kati ya wachezaji wapya waliovutia kwenye mchezo huo. Szoboszlai, aliyechezeshwa nje ya nafasi yake ya kawaida kama beki wa kulia, ndiye aliyeamua matokeo kwa bao la kipekee.
Zubimendi alimchezea rafu Curtis Jones umbali wa yadi 25 kutoka lango, na Szoboszlai alijitokeza kupiga kwa ustadi wa hali ya juu.
Liverpool, ambao ndio timu pekee iliyobaki na rekodi ya ushindi wa asilimia 100 kwenye ligi, wanakwenda mapumzikoni kwa mechi za kimataifa wakiwa kileleni mwa jedwali, wakisaka taji lao la 21 la England.
Arsenal kwa upande wao wanapaswa kutafakari baada ya matokeo yaliyoonyesha kuwa harakati zao za kukomesha historia ya kumaliza nafasi ya pili mara tatu mfululizo bado hazijakomaa.
Mapema katika uwanja wa Amex, mshambuliaji wa City Erling Haaland alifunga bao lake la 88 katika Ligi Kuu kwenye mechi yake ya 100 tangu ajiunge kutoka Borussia Dortmund mwaka 2022.
Lakini bao hilo la tatu kwa msimu huu kwa Haaland, mwenye miaka 25, halikutosha kuisaidia timu ya Pep Guardiola kurejea kwenye ushindi baada ya kupoteza 2-0 nyumbani dhidi ya Tottenham wiki iliyopita.
Sports
Sinner na Alcaraz Wakutana Tena Fainali ya US Open Baada ya Muitaliano Kufuzu Fainali ya Tano Mfululizo ya Grand Slam
Bingwa taji la US Open mchezo wa tenisi Jannik Sinner anatarajia mechi ya kipekee na “maalum” atakapokutana na mchezaji wa pili duniani Carlos Alcaraz raia wa Uhispania kwenye fainali ya wanaume ya US Open baada ya Muitaliano huyo kufuzu kwa fainali yake ya tano mfululizo ya Grand Slam siku ya Ijumaa.
Sinner alimshinda Felix Auger-Aliassime kwa seti 6-1, 3-6, 6-3, 6-4 na sasa analenga taji lake la tano la Grand Slam baada ya kujiunga na Rod Laver, Roger Federer na Novak Djokovic kama wanaume pekee kufika fainali zote nne za Grand Slam katika msimu mmoja.
“Nadhani kufika fainali tano mfululizo za Grand Slam ni jambo kubwa. Uthabiti na kujiweka katika hatua za mwisho za mashindano makubwa tuliyonayo, ni kitu cha kushangaza,” alisema Sinner.
Nafasi yake ya kwanza duniani itakuwa hatarini Jumapili wakati atakapokutana na Alcaraz kwa mara ya tatu mfululizo katika fainali ya Grand Slam.
Sinner mwenye umri wa miaka 24 alitwaa mataji ya Australian Open na Wimbledon msimu huu lakini alifungwa na Alcaraz mwenye miaka 22 katika pambano kali la seti tano kwenye French Open.
“Uwanjani tunapenda kukutana, unajua, kwa sababu kutokana na nafasi zetu kwenye viwango, inamaanisha tunafanya vizuri kwenye mashindano,” alisema Sinner.
Watakutana tena US Open kwa mara ya pili. Mchuano wao wa kwanza ulikuwa robo-fainali ya 2022, pambano kubwa lililounda ushindani wao.
“Jumapili ni siku maalum sana na fainali ya kushangaza tena,” alisema Sinner. “Ninahisi ushindani wetu ulianza hapa kwa kucheza mechi ya ajabu. Sasa sisi ni wachezaji tofauti, wenye kujiamini zaidi pia.”
Miaka mitatu iliyopita, Alcaraz ndiye aliyeshinda baada ya pambano lililodumu saa 5 na dakika 15 na kumalizika kabla ya saa 9 alfajiri huko New York, na Mspaniola huyo akaenda kunyanyua taji lake la kwanza la Grand Slam kwenye mashindano hayo.
Sinner analenga kumshinda Alcaraz Jumapili kwa kutwaa taji lake la tano la Grand Slam. Mafanikio hayo yamejengwa zaidi kwenye ushindi wa mechi 27 mfululizo za Grand Slam kwenye uwanja wa hard court.
Analenga kuwa mwanaume wa kwanza kutetea taji la US Open tangu Federer alipochukua la mwisho kati ya mataji yake matano mfululizo mwaka 2008.
Mkanada Auger-Aliassime alikuwa akijaribu kufuzu kwa fainali yake ya kwanza ya Grand Slam baada ya kufika nusu fainali kwa mara ya kwanza tangu safari yake hadi hatua hiyo hiyo kwenye US Open mwaka 2021.
“Sina majuto. Nilicheza kwa njia yangu. Nilicheza mchezo wangu. Unajua, kwa namna fulani unaishi na kufa na maamuzi yako,” alisema Auger-Aliassime.
Sports
Ndoto ya Harambee Stars ya kufuzu Kombe la Dunia 2026 Yagonga mwamba baada ya kupigwa 3-1 na Gambia Kasarani
Ndoto ya Harambee Stars ya kufuzu kwa Kombe la Dunia la FIFA 2026 ilizimwa rasmi hapo jana baada ya kuchapwa mabao 3-1 na The Scorpions ya Gambia katika mechi ya kufuzu ya Kundi F la CAF iliyochezewa Uwanja wa Kasarani.
Scorpions, wakiongozwa na kocha wa zamani wa Gor Mahia Jonathan McKinstry, walitoa mchezo wa kiukatili katika kipindi cha kwanza dhidi ya vijana wa Benni McCarthy, na kuhuisha matumaini yao ya kufuzu kwa fainali zitakazofanyika Marekani, Kanada na Mexico.
Harambee Stars, waliokuwa na matumaini finyu ya kufuzu, walizidiwa maarifa na upande wa Gambia uliokuwa makini zaidi, uliodhibiti mchezo ndani ya dakika 30 za kwanza.
Udhaifu wa safu ya ulinzi ya Kenya ulionekana mapema dakika ya 12 pale Sulayman Sinyan alipofunga kwa kichwa akimalizia kona ya ndani ya Yankuba Minteh, mshambuliaji wa Brighton & Hove Albion, na kuwaweka Stars kwenye presha.
Minteh, aliyewasumbua mabeki wa Kenya mara kwa mara, aliongeza bao la pili dakika ya 26 kwa shuti la utulivu lililokwenda chini kushoto baada ya kuchukua faida ya makosa ya safu ya kiungo ya Kenya.
Gambia waliongeza bao la tatu dakika ya 38 kupitia Musa Barrow aliyepiga shuti kali la volley lililoenda moja kwa moja hadi kona ya mbali ya goli, na kufunga rasmi mchezo.
Safu ya ulinzi ya Kenya iliendelea kuonekana dhaifu, na hasira zikadhihirika katika muda wa nyongeza wa kipindi cha kwanza pale Collins Sichenje alipokumbwa na kadi ya njano kufuatia rafu mbaya – hali iliyomwacha kocha McCarthy akiwa mwenye hasira pembeni mwa uwanja.
Stars walionekana kufufuka baada ya mapumziko kufuatia mabadiliko mawili ya wachezaji yaliyoongeza nguvu, na juhudi zao ziliwalipa dakika ya 81.
Ryan Ogam, aliyeingia kutoka benchi, alipiga shuti kwa mguu wake dhaifu wa kulia katikati ya kisanduku na kufunga bao lililoleta matumaini kwa wenyeji.
Hata hivyo, ilikuwa ni kuchelewa mno kwani wageni waliweza kudhibiti mchezo hadi mwisho na kuondoka na alama zote tatu.
Matokeo hayo yanaiweka Kenya ikiwa na pointi 6 pekee katika Kundi F, na ndoto yao ya Kombe la Dunia 2026 ikizimika rasmi licha ya kubakisha mechi tatu.
Kwa upande wa Gambia, ushindi huu uliwapandisha juu ya Kenya na kuweka hai matumaini yao ya kufuzu, ingawa wanakabiliwa na changamoto kubwa dhidi ya Burundi na Gabon.
Kwa Kenya, macho sasa yanaelekezwa kwenye mchezo wa nyumbani dhidi ya UShelisheli siku ya Jumanne ambapo watatumai kumaliza mapumziko ya kimataifa kwa ushindi, huku wakiangazia maandalizi ya kampeni ya AFCON 2027.
Waziri wa zamani Dalmas Otieno Afariki
Baraza la vyombo vya habari MCK lakerwa na baadhi ya vyombo habari
